لوبي بالدجاج

لوبيا بالدجاج
بعد ما قلينا البصلة مع شويا طماطم "الشعب يعني" و بعد ما خليناه يتحرق شويا على نار قوية"القصبة و نار الفتنة" و بعد ما حطينا اللوبيا في البرمة"الحكومة الاولى و الثانية"توا نمرقوها بشويا ماء "الأنتخابات" و بعد نسكروا عليها البرمة و نخليوها تبقبق و تشرب مها " الشعب يستنى في المطعم أش باش يخرجلهم ماكلة"
نحلوا البرمة توا نشوفوها وين وصلت نلقاو اللوبيا مزالت محصحصا "السبسي عمل الريحة و النهضة تحب تخليه" بعد ما حركنا منيح باش ما يلصقشي "ردت فعل الشعب على قرار أبقاء السبسي"نعاودوا نسكرو البرمة و نخليوها تزيد تبقبق في عقلها شعنا نعملوا كان نستناو و البخار أهوكا قاعد يطلع "الأشاعات" و عينينا على البرمة نعاودوا نحلوا الغطاء نشوفوا مرقت اللوبي فين وصلت نلقاو الي جلدة الدجاجة بدات تتحرق"حركة النهضة"و اللوبي ما يحبش يطير عفوا يطيب و في ضل عدم رضا المستهلك لهل الطبخة نحاولوا نزينوها بشويا فلفل بر العبيد"حكومة خفية''

 شويا مالح "ولاد فرنسا و البي دي بي " نزيدوا معها صحين سلطة فقوص "المجلس التأسيسي المدني "و هكا نتصورها باش تعجب برشا ناس بالأخص جماعة الفرشيطة و السكينة"القبة" خاطر اللوبيا ما تتهزش بالفرشيطا أما بقية الناس مهيش باش ترضا و باش تولي أحتجاجات في المطعم وقتها بالزهر فما عركا بين مولى المطعم والخدامة"المجلس التأسيسي" علاش هل العركة يا هل ترى كل ما ثما انوا واحد يقول حط الدجاج أكثر من اللوبيا" مواطن شغل و عمل و التشغيل حق دستوري"

 و واحد يقولك لا حط اللوبيا أكثر من الدجاج   "في أشارة انوا الأصلاحات تكون سياسية و تقتصر كان على سن الدستور".

 طرف اخر يقلك اللوبيا هيا تمنيك على ذقون الناس و انا ما نخدمش في مطعم يغش و فيه طباخة ما تعرفش يطيبوا و ما تعرفشي حتى قداش تقعد اللوبيا على النار ساعة و الى سعتين "صاحب النظارة".
أم الشق الاخر يقول الزوز غالطين و انا باش نبطل تطيب اللوبيا و باش نولي نعارض كل شي و نتبع كل طبخة بالعدل و بالديمقراطية "البي دي بي و غيروا"

العركة القوية بين مولا  المطعم و الشاف كوجينة واحد يقولوا أنا مولى المحل شاري كل شي من جيبي حتى الكراسي و لاخر يقلوا انا شاف الكوجينة و انا المسؤول الاول و الاخير على "المونيو" و الكرتا

و المشكل لهنا بعد ساعات من الحجر و انا عندي الحق و لا انتي ما عندكشي حق ...
حتى شخص ما تسربا و الناس الكل على أعصابها و اللوبيا كيف برد زاد حصحصة و الدجاجة بردة و لات جلود ترصتلنا نلوحوا اللوبيا و الدجاج في الزبلة و نطيبوا لوبيا جديدة و ربي يعوض علينا 

أكسبلوزيف