سلطة تونسية

نعرف الي مغلب المسلمين اليوم صايمين و جاء الوقت باش نحطوا البرمة على النار و نصيغوا معاه هل المقال 

 مقال يكون حرحوري بالهريسة العربي و الفلفل زينة و نحطوا البرمة على النار و خلي تبدا تتقلى هل التدوينة 

برشا عباد تتشفع مالأسوام متاع العلوش و برشا تنبرات تنبرت على الفايسبوك

وصلت حتى قالو لو كان سمع سيدنا أبراهيم عليه السلام بسوم العلوش اليوم راهوا ذبح ولدوا في عوض ما يذبح العلوش

 فما شكون عقب على هل الكلام و قال سوم العلوش السنا نزيدوا ألفين و نشري نمر و الي طلع بهل التنبيرا ضهرلي فيه حضر على البيعة و الشريا متاع نمر صخر الماطري 

في ضل هذا الكل و كانك من المناطق المنكوبة من مياه الأمطار نقلك أقعد في الشمس خلي تشيح 

زدا ما ننساوش التشكيلة الجديدة الي هوايتها الفسكوبي و اول ما بداو يفسكيوا فسكاو على المجلس التأسيسي 

و نلقاو الحكومة تغني و جناحها يزغرط عليها ...نلقاو مراسيم قعدا تتعمل و قوانين قعدا تتفسخ 

نلقاو زادا الفرقة النحاسية متاع الحكومة او ما يعرف بالمجورات ترقص على أنغام أغنية خبيني لمطربة القديرة أمينة شاخت

بعد ما التلفزة التونسية صورة موش بلعاني كمال لطيف في حفل السفارة الجزائرية 

لكن الايقاع يتبدل و كل أذن أش تسمع و أش يطربها نلقاو التجمعيين اليوم في هل العيد حطين قناة السعودية  في التلفزة يتفرجوا في مناسك الحج و حاطين في الشان ستيريوا الأغنية الشهيرة"الأماكن كلها مشتاقة ليك"

في جهة الأخرى من تونس الحبيبة نلقاو الأسلامين يسمعوا في أغنية أخصمك أه أسيبك لا للفنانة اللامعة ننسي بنت عجرم 

أم صاحب النظارة فأكتفى بسماع أغنية الأحرار ما يخافوش للصوت الجميل التونسي امال المثلوثي 

نجد في منطقة الهجوم حزب التحرير فقد أختار القصائد على الكلام يغنيه, يطرب أذانه بقصيدة لا يغريك الصمت و لا سكاتي فأن حاورتني تتذوق ويلاتي 

هذا ما تحتويه البرمة اليوم و رد بالك تنسى قبل ما تهبطها من الغاز تحطلها حبات البرودوكنور المتوفرة امام كل وقفة احتجاجية تحمل راية أعتقني 

و هكا كنا قدمنا برمة اليوم و يا حي غدوا نعملوا تدوينة جديدا و برمة جديدا تحت عنوان سلخان علوش و تكسير مفاصل